Laminat, yoxsa taxta döşəmə?

Laminat deyərkən ilk öncə ofislərdəki, üstündə gəzəndə qəribə "səs" edən yer örtüyü ağlımıza gəlir. Amma bu, əslində köhnə stereotipdir. Sözsüz ki, laminatın "səs" etməsi onun düzgün quraşdırılmaması və keyfiyyətsizliyi haqda bəhs edir. İkinci stereotip laminatın ekoloji cəhətdən təhlükəli olmasıdır ki, bu da bir cəfəngiyatdır. Çünki laminatla bərabər istənilən digər materiallarında keyfiyyətli və keyfiyyətsiz variantlar var. Bəs laminat haqda düşünərkən əsas nəyi bilməliyik?
İlk öncə prioritetləri düzgün qurmalıyıq. Əgər biz tez bir zamanda montaj və demontaj (misal üçün su sızması halında) olunan, cızılmağa və tədricən solmağa davamlı (xüsusən uşaqlı ailələrə), çoxlu rəng və model seçiminə üstünlük veririksə, o zaman laminat ən ideal variantdır.
Laminat seçərkən bu xüsusiyyətlərdən savayı, onun sinfinə və qalınlığına diqqət yetirmək lazımdır. Laminatın sinfi onun üst səthinin nə qədər sərt və davamlı olması haqda bəhs edir. Adətən 30, 31, 32, 33 və nadir hallarda 34-cü sinfə rast gəlmək olar. Sinif nə qədər yüksək olsa, bir o qədər yaxşıdır. Qalınlıq lövhənin ümumi qalınlığı deməkdir, bu da 7, 8, 10 və 12 mm qalınlıq deməkdir.
Taxta döşəmə
Hamımızın tanıdığımız və bildiyimiz taxta pol müxtəlif şam ağaclarının növlərindən hazırlanır. Həmin şam ağacları müxtəlif olduğu kimi, həmin döşəmə taxtalar da öz keyfiyyəti ilə fərqlənir.
Stereotip 1. Taxta döşəmə aşağı keyfiyyətli yer örtüyüdür. Əslində bu, belə deyil, çünki hazırlanmasında təbii ağac massivi istifadə olunub, bu da həmin materialı çox keyfiyyətli edir, yetər ki ağacın özü keyfiyyətli olsun.
Stereotip 2. Taxta pol tədricən "səs" etməyə və aralanmağa başlayır. Taxta döşəmə özü "səs" edə bilməz, altındakı laqalar "səs" edir, bu da taxta döşəmənin deyil, məhz montajın problemidir. Döşəmənin aralanması da onun keyfiyyətsiz montaj olunması haqda bəhs edir.
Taxta döşəmə universal yer örtüyü növü deyil, bu səbəbdən onu bütün təmir üslublarına tətbiq etmək olmur. Loft, Minimalizm və müəyyən hallarda Şale üslublarında işlətmək olar.