Xarici dil öyrənməyin qazandırdığı üstünlüklər
Xarici dil öyrənmək üçün qərar vermədən öncə mütləq edilməsi gərəkən bir iş var. Motivasiya mənbəyinizi tapmaq. Yəni siz dili öyrənmə səbəbinizi müəyyən etməli, bu dilin sizə verə bilcəyi töhfə və faydalarını daim xatırlamalısınız. Öyrəndiyiniz xarici dil əgər sizə bir şey qatmayacaqsa, heç bir fayda verməyəcəksə, bu dili istifadə etməkdə məqsədiniz yoxdursa, dili sistemli bir formada öyrənmək üçün həvəs və motivasiyanız olmayacaq.
Xarici dil öyrənməyin birinci faydası beyin gücünü artırmasıdır. Yəni siz yeni bir dil öyrəndiyiniz zaman beynininiz müxtəlif bacarıqları inkişaf etdirməyə başlayır. İstənilən xarici dil ilə ilk dəfə tanış olduğumuz zaman çoxlu asan və çətin sözlər ilə qarşılaşırıq. Həmçinin qarışıq qrammatika, cümlə strukturu ilə də rastlaşa bilərik. Yeni xarici bir dil öyrəndiyimiz zaman beynimiz bu sözləri, qrammatika qaydalarını anlayıb, qavrayıb və daha sonra müəyyən bölmələrdə bu məlumatları saxlamalı olur. Bu proses davamlı olaraq baş verdiyi üçün də zamanla beyinin məlumatlararası əlaqə qurma, məntiqi düşünmə, bir problemi tez və effektiv biy yolla həll etmək kimi bacarıqlarını sürətlə inkişaf etməyə başlayır.
Xarici dil öyrənməyin ikinci faydası yaddaşı gücləndirməsidir. Beynimizi nə qədər çox işlətsək, o da bir o qədər çox yaxşı funksiyalarını işlədər. Xarici bir dil öyrənmək isə bunun üçün əla yoldur. Belə ki, xarici bir dil öyrəndiyimiz zaman istifadə etdiyimiz və yadda saxlamağa çalışdığımız sözlər sayəsində zamanla beynimizin yadda saxlama qabiliyyəti inkişaf etməyə başlayır. Hər dəfə daimi olaraq biz yeni bir söz öyrəndimiz, onu danışıq prosesi zamanı cümlələrdə istifadə etdiyimiz zaman beynimiz bir növ gimnastika etmiş olur.
Xarici dil öyrənməyin üçüncü faydası multifunksional ola bilməyə yardımçı olmasıdır. Hər bir şeyin sürətlə dəyişdiyi müasir dünyamızda bəzən hər gün bir çox işi etməyə məcbur oluruq. Bu da bizləri çox vaxt işləri vaxtında çatdırmadığımız zamanlar əsəbi, aqressiv və yorğun hallara salır. Edilən bir araşdırmaya görə, xarici bir və ya bir neçə dil bilən insanlar daha multifunksional olur. Gün ərzində birdən çox etməli olduqları işlər olsa belə rahatlıqda vaxtında həmin işləri edə bilirlər. Bunun səbəbi isə yuxarıda qeyd etdiyimiz xarici bir dil öyrənmənin beyin gücü və yaddaşı inkişaf etdirə bilmə bacarıqlarıdır.
Xarici dil öyrənməyin dördüncü faydası digər sahələrdə də inkişaf etməyimizə təkan verməsidir. Uşaq vaxtı evdə və ya məktəbdə niyə xarici bir dili öyrənməyimiz ilə bağlı bir çoxumuz suallar vermişik. Çox vaxt bizə iş və təhsil ilə bağlı avantaj əldə edəcəyimizi desələr də, xarici dil öyənməyin digər bir faydasını demək unudulurdu. Xarici bir dil öyrənmək beyin, yaddaş, qərar verə bilmə və digər bacarıqları inkişaf etdirir. Bununla yanaşı çox vaxt riyaziyyat, fizika, standart oxuyub anlama bacarıqlarını da inkişaf etdirmiş oluruq.
