Parketin növləri arasındakı fərqlər
Klassikanı sevənlər və konservatorlar üçün ən maraqlı mövzu yer örtüyüdür və bu sözsüz ki, onlar üçün parket deməkdir. Amma parket döşəmək haqda düşünürsünüzsə, bilməli olduğunuz məqamlar var.
Hazırda bazarda 3 parket növü var: əsrlər boyu istifadə olunan ədədli xam parket, parket lövhəsi və massiv parket.
Xam parket ötən əsrin əvvəlindən belə istifadə olunur və artıq bir neçə nəsillərin rəğbətini qazanmış bir yer örtüyüdür. Bu səbəbdən də mənzil alanda və ya satanda ilk olaraq qürurla vurğulanan məqam "Yer parketdir" ifadəsi heç də təsadüf deyil, çünki məhz həmin yer örtüyü qiymətə təsir edən əsas amildir. Amma bu gözəllik də "qurbanlar" tələb edir: xüsusi diqqət, baxım və təmizləmə üsulları, 10 ildən bir yenidən cilalanma və yenidən dolğu və lak vurulma. Cızıqların görsənməməsi üçün də parlaq deyil, məhz mat istifadə olunması tövsiyə olunur. Əsasən fıstıq və ya palıd parketlərdən istifadə olunur, sözsüz ki, palıd ağacı fıstıq ağacı ilə müqayisədə daha möhkəm və etibarlıdır.
Parketlər 6 cür olur: 5, 4, 3, 2, 1 və əla növ. Növlər keyfiyyəti ilə deyil, məhz rəngi və ornamenti ilə fərqlənirlər. Yəni 5-ci növ müxtəlif rəngli bir yer örtüyü, əla növ isə bir tonlu, eyni rəngdə, eyni ornamentdə rəssam tərəfindən ideal çəkilmiş bir rəsm əsəri kimi yer örtüyü deməkdir. Bu yer örtüyünü seçən müştərilər adi təmirə sərf olunan müddətdən 14 gün daha çox vaxt sərf edəcəklər, bu, parketin montajı, cilalanması, dolğunun və lakın quruması ilə əlaqədardır.
Parket lövhəsi parketlə laminatın qarışığıdır, belə ki, üst səthi qiymətli təbii ağac növündən, alt hissəsi isə laminatda olduğu kimi presslənmiş DSP materialından ibarətdir. Laminatda olduğu kimi, kilid sistemi ilə montaj olunur, yüksək keyfiyyətli və uzunömürlü bir yerörtüyüdür.
Massiv parket bütövlükdə təbii ağacdan hazırlanır və xam parketdə olduğu kimi, üst qatı digər yer örtükləri ilə nisbətdə bir qədər zərifdir və bu səbəbdən də massiv parketin xüsusi diqqət, baxım və təmizlənməyə ehtiyacı var.
